香港新浪網 MySinaBlog
« 上一篇 | 下一篇 »
皇帝 | 2nd Oct 2006, 16:38 PM | 回憶 | (1628 Reads)

平均分: 10.00 | 評分人數: 2

放假雖然不算閒,但可以做到一些平日做不到的事,包括寫今天這篇。我突然想,能不能找到一篇以前中學時寫的週記,日期剛好也是10月2日的呢?真的給我找到了,因為是那年的新開學不久,寫出來的東西都似是給新班主任的一封聲明信一般。我是從來不會回看自己寫下的週記的,因為總覺得當時是被強迫為了交功課而寫的,不過今天重看這篇十多年前寫下的當年今日,還挺有趣(幼稚)的呢﹗

下文只是將那篇陳年週記抄一次出來,所以是口語的,而且非常地長,請見諒﹗請忍耐﹗不過我會在當中加入我現在對當時所寫的東西的感受,()裡的以書面語寫的就是現在的感想了。


哈哈﹗你都幾另噃,一估就估到我偶像唔係歌星,俾個提示你啦,佢係姓梁嘅,估唔估到呀?

原來你唔知咩嘢叫做「男仔頭」,就等我解俾你聽啦﹗「男仔頭」係「田力人子豆頁」之簡稱,解作「有一個响田度出力嘅人嘅兒子好鐘意一路食豆一路搞百頁窗。」依家你知道點解啦﹗

(我有點佩服當年的我,竟可鬼扯這種東西出來,可說是跟現在的我不相伯仲,一樣無聊。)

既然呢本嘢兩個禮拜先至寫一次,點解唔叫做「雙週記」呢?

(來了,吐糟的看家本領出來了。)

我終於做咗圖書館館理員啦,逢Day 1 Day 4 lunch time當值,好開心呀﹗

(多麼單純啊,只是區區一個圖書館館理員便開心成那樣子。)

首先聲明一點,就係我响週記度同你講嘅嘢,你係唔可以同我嘅家長提起嘅,因為有D嘢係連佢哋都唔知嘅,我諗你一定做到嘅,係唔係?

班嗰個board終於都做唔哂,老實講,我都唔係好有心機做呢個board,因為時間又少,idea又差,個個又掛住玩,反而圖書館個board我就有心機做,因為我鐘意個idea。

(開始發怨言了,不就跟現在一樣嗎?真沒進步呢﹗)

前晚中秋節幾開心,去嗰D中秋晚會,同幾個舊同學一齊玩煲蠟,有雪糕食,又有橙汁飲,仲有獎抽,我哋都有抽到獎,我仲見到陳淑君上台唱「情人知己」添,成晚唱歌唱得最好聽都係佢咯。

(果然還是煲蠟,不過我可不記得有抽到過獎這回事呢﹗至於那位陳淑君……是誰呢?)

昨日我班舅父舅母同埋亞婆入嚟我哋度食飯,首先我同四舅父玩Scrabble,由於佢係第一次玩,所以我大獲全勝,跟住我就同七舅父打機打到食飯,佢哋就睇埋「包青天之古琴情怨大結局」先至走。

(比較存疑的一點是到底我是怎麼跟七舅父「打機打到食飯」的呢?我家又沒電視遊戲機,難不成是他特地帶來我家跟我玩的嗎?)

今朝睡到成十點,因為昨晚成十二點幾先至睡,今朝十一點幾就返學校畫埋幅畫,見到有個好似你嘅物體坐咗响教員室入面,跟住十二點半去上英文班,教我哋嗰個係鬼婆,佢話佢叫做Gaby喎,咁我哋玩遊戲啦,不過次次都係我哋呢邊勝,因為我哋呢邊D人舉手舉得好踴躍。陳班長第一堂就冇返啦。

(「十二點幾先至睡」……好早啊~要是我現在每天能維持在這個時間上床睡便已經很好了……)

其實我覺得你係唔應該彈我哋個壁報,人哋中英會談都談咗好多輪啦,又唔見佢哋有乜進展。何況距離最後期限的時間極少,加上你又唔俾我哋lunch time留响度做,所以進展緩慢嘅責任不在我哋。你知唔知呀Sir Sir,唔係樣樣嘢都可以返屋企至做架,如果每個人都返屋企做D嘢出嚟,但係每樣嘢嘅比例都唔相同,咁點算先。我哋有幾個人都係做上一年最後一個用嚟比賽嘅壁報,都唔知做得幾開心,我哋做咗兩個幾月,有非常充裕嘅時間,個idea諗得非常之好,藍Sir又俾我哋lunch time留响度做,又成日陪住我哋,幫埋我哋手做嘢,我哋叫佢上嚟睇我哋做嘢佢都會上嚟,佢唔係好似你咁一上嚟就彈三彈四,佢係會幫埋我哋做,等到我哋個壁報做好之後,佢又俾我哋屈咗一百蚊嚟慶功,不過D錢就唔知係唔係佢架嘞,卒之我哋個壁報都不負眾望咁勝出咗。不過我都知你好忙嘅,係唔係?

(這段……我完全感到我的黑模式正在發動中,超強勁的單單打打,連中英會談都搬出來引用了,以對比手法將這個新班主任貶到地獄去,最後還是加一句咋聽似是貼心實質是「串」他的說話,厲害﹗)

舊時我上數學堂都好開心架,因為Miss Young夠爽快,講嘢唔會拖泥帶水,有時又會同我哋開吓玩笑,點到即止。但係依家你上數學堂我就唔係好慣嘞,我唔係話你教得唔好,不過有時你一樣嘢講好耐,或者講好多種方法,我知你係想我哋更加明白,但係我就俾你搞到我糊塗哂,有時我本來已經明白咗嘅嘢,俾你講多兩講我就變咗唔明白。有時上科學堂想聽清楚你講乜嘢又聽唔到,可能因為我哋坐邊邊位,聽得唔係好清楚,甚至問番隔離左右前後D同學都話唔知你講乜。

(繼續評擊,不過以退為進,以自己不慣為由,不直接指責老師的不是,即使聽不清楚也歸到環境因素去,卻也要強調其他同學也跟自己一樣聽不清楚,繞個圈去罵也一樣行呢﹗)

其實我今年先至知道我哋本手冊要打印咋,上一年藍Sir都冇同我哋提過本手冊要打印嘅。

你話你「很年輕,廿多歲」,究竟廿幾呀?廿九歲半呀?唔好吊人胃口嘞,坦白D啦﹗你哋D大人最鐘意隱瞞自己嘅歲數架啦,男男女女都係咁,真係想問吓你哋係咪驚蝕底呢?

(現在我也已是個喜歡隱瞞自己歲數的大人了呢﹗)

我想話俾你聽,你D中文字好「靚」呀,不過你好過藍Sir,佢D中文字仲「靚」過你嗰D呀,唔知係咪寫慣英文嘅人D中文字都咁「靚」嘅呢?

如果你依家都仲未估到我嘅偶像係邊個,咁我俾多個提示你吖:佢嘅座右銘係「書到用時方恨少」。估到未呀?

最後,如果我今次寫嘅嘢有乜嘢得罪嘅地方,請你多多包涵。

(直頭非常得罪了吧?原來以前的我已經是那麼「激」的了,學年一開始便對班主任下那麼辛辣的批評,難怪他後來總是針對我了。)

北京失去奧運主辦權,中國應該努力改進,令到班死鬼佬無話可說﹗

(哇,我的中國魂原來不弱呢﹗不過沒事也不知為何要罵人家「死鬼佬」?)


以上,就是當年少不更事的我被迫寫給班主任的所謂週記。相比起來,今天我已經算是收斂了,雖然批評、不滿什麼的還是很多,卻不會那麼隨意向對方坦白說出來。做人處世,其實就是不斷地學習如何收藏自己的感受以減少對別人的傷害,真我什麼的盡量別讓它浮現出來,就放在Blog上好了。


[1]

好搞嘢!emoticon


[引用] | 作者 金婆婆 | 2nd Oct 2006 17:12 PM | [舉報垃圾留言]

[2] 回金婆婆

唔夠婆婆你搞野﹗emoticon


[引用] | 作者 皇帝 | 2nd Oct 2006 17:21 PM | [舉報垃圾留言]

[3]

哈,我以前都對我d miss 阿sir好激呢…除左因為佢地做事過份外,亦因為少年氣盛


[引用] | 作者 子木 | 2nd Oct 2006 18:50 PM | [舉報垃圾留言]

[4]

嘿, 這兒轉了背景呢~

你....你中學時期竟然可以用口語寫週記俾老師?! 我諗一般老師都會要求寫白話文吧...


[引用] | 作者 yan | 2nd Oct 2006 22:15 PM | [舉報垃圾留言]

[5]

皇上仍然好風趣

"做人處世,其實就是不斷地學習如何收藏自己的感受以減少對別人的傷害,真我什麼的盡量別讓它浮現出來,就放在Blog上好了。"emoticon 是好還是不好呢????????


[引用] | 作者 松尾 駿 | 2nd Oct 2006 23:10 PM | [舉報垃圾留言]

[6]

你都好直喎。

我D周記通常都係滹繾了事,更加唔會直斥其非,又唔會講同學是非,都可以話係一個乖學生囉。


[引用] | 作者 kitB | 3rd Oct 2006 11:48 AM | [舉報垃圾留言]

[7] 回子木

同意,唔係回頭睇根本唔會覺得有少年氣盛呢回事呢﹗


[引用] | 作者 皇帝 | 3rd Oct 2006 18:28 PM | [舉報垃圾留言]

[8] 回yan

第一次用唔係default既背景,係咪好似跌左落海咁呢?

我地果時一被要求寫週記就問可唔可以寫口語同簡體字,因為唔係中文功課所以都冇問題。


[引用] | 作者 皇帝 | 3rd Oct 2006 18:30 PM | [舉報垃圾留言]

[9] 回松尾 駿

當然凡事有利就必有弊,冇話好唔好既,就睇對自己感覺好唔好囉﹗


[引用] | 作者 皇帝 | 3rd Oct 2006 18:31 PM | [舉報垃圾留言]

[10] 回kitB

好直……呢個評語已經被人由小學開始加在我身上架啦,所以我自己一早就知,但好難改既……
所以我唔算好乖,操行不嬲都在B與B+間浮沉。


[引用] | 作者 皇帝 | 3rd Oct 2006 18:33 PM | [舉報垃圾留言]

[11]

"北京失去奧運主辦權,中國應該努力改進,令到班死鬼佬無話可說"

多年心願終於完夢了吧~~XDDDD
我也儲好自己的日記之類的,
以後再拿出來看吧~


[引用] | 作者 | 3rd Oct 2006 21:15 PM | [舉報垃圾留言]

[12]

「男仔頭」係「田力人子豆頁」之簡稱,解作「有一個响田度出力嘅人嘅兒子好鐘意一路食豆一路搞百頁窗。」



哈哈,超喜歡這句!!! 經典啊!!!!


[引用] | 作者 小零八 | 3rd Oct 2006 22:10 PM | [舉報垃圾留言]

[13]

哈,想不到您的週記是這樣子的呢。

我當年表面上可是個乖乖牌。


[引用] | 作者 廿八刀 | 4th Oct 2006 01:20 AM | [舉報垃圾留言]

[14] 回皇帝

我是從來不會回看自己寫下的週記的,因為總覺得當時是被強迫為了交功課而寫的

同意的说..不过皇帝..真素..好大胆、好过分...我若这样写肯定挨批。。。估计会被请去喝茶...进行“思想教育”


[引用] | 作者 月影星光 | 4th Oct 2006 07:36 AM | [舉報垃圾留言]

[15]

你的雙週記好正! 你亦好「勇」! 我念中二時也被班主任被逼寫雙週記. 那時, 我是乖乖地寫的. 只是..... 在最後一篇(怕他報服嘛!), 我引了一句絕句「請教」他接下去. (因為他是教中文科的).
不過, 他竟然真的接上了啊! :O


[引用] | 作者 傲雪 | 4th Oct 2006 12:45 PM | [舉報垃圾留言]

[16] 回星

哈,講起上黎又係喎﹗事隔十數年後終於得咗嘞﹗

學校冇迫你地寫咩?


[引用] | 作者 皇帝 | 4th Oct 2006 17:54 PM | [舉報垃圾留言]

[17] 回小零八

我只可以話,我依家先知原來我以前咁有創造力,俾著依家既我,真係諗唔出d咁既野,所以今次都睇得我想寫個「服」字俾以前既我。


[引用] | 作者 皇帝 | 4th Oct 2006 17:56 PM | [舉報垃圾留言]

[18] 回廿八刀

唔睇返我都以為自己其實好乖架……


[引用] | 作者 皇帝 | 4th Oct 2006 17:58 PM | [舉報垃圾留言]

[19] 回月影星光

是否真的很過份?我今天也不敢肯定的說,因為我當時之所以會這樣寫一定是因為我真的很不滿,寫出來才可以將自己的不滿讓老師知道,說不定老師也會因此而作自我反省,改善自己不是挺好嗎?


[引用] | 作者 皇帝 | 4th Oct 2006 18:02 PM | [舉報垃圾留言]

[20] 回傲雪

有時被迫也是好事呢,要不是當年被迫寫下這種東西,今天便沒機會作自我反省了。
我也試過寫了差不多50條從收音機聽回來的IQ題來交給老師當週記內容並要他全部作答,雖然他沒多少條是答對的,但肯花時間全部都答幾個字上去已讓我覺得他不錯,我現在才知道老師其實是很忙的。
你的中文老師還算是有真材實料的嘛﹗


[引用] | 作者 皇帝 | 4th Oct 2006 18:08 PM | [舉報垃圾留言]

[21] 回傲雪、皇帝

我也有在周记里出题难过老师.....

是否真的很過份?我今天也不敢肯定的說,因為我當時之所以會這樣寫一定是因為我真的很不滿,寫出來才可以將自己的不滿讓老師知道,說不定老師也會因此而作自我反省,改善自己不是挺好嗎?

我感觉素很过分啦。。。。不只是说他教的不好嘛..还有故意找茬的- -
PS:不过记得有次老师问我们觉得他怎样。我当堂指责他很懒,素不素更过分。。。
再PS:上面的字好险就被吃掉了,还好发现不对及时复制- -。。。


[引用] | 作者 月影星光 | 5th Oct 2006 05:14 AM | [舉報垃圾留言]

[22] 回月影星光

學生平日被老師問得多,都喜歡在週記裡反問老師呢﹗

如果你當時是笑著指他懶的話,我想他會當你說笑吧?

以後都在送出前先複製一次好了,否則很危險呢﹗


[引用] | 作者 皇帝 | 5th Oct 2006 17:54 PM | [舉報垃圾留言]

[23]

平時既週記 我都無你甘大膽 竟然係到鬧老師 蝦人地係新老師啊?我都係每年學期尾時 先狠狠地寫封信同老師攤開黎講乍 不過 上年個班主人到依家都未回我的信 !


[引用] | 作者 b | 6th Oct 2006 23:35 PM | [舉報垃圾留言]

[24] 回b

哇,你都唔弱啫,狠狠地寫封信攤開黎講,在學年尾先搞,係怕成績上的評語唔好睇?


[引用] | 作者 皇帝 | 7th Oct 2006 12:33 PM | [舉報垃圾留言]

[25]

老師都唔會將我既成績點既 最多係30%既平時分會少d 我最怕係操行分同評語乍!


[引用] | 作者 b | 7th Oct 2006 21:34 PM | [舉報垃圾留言]

[26] 回b

係啦,老師既權力就只能管到操行既啫,成績係靠自己實力既。


[引用] | 作者 皇帝 | 9th Oct 2006 00:56 AM | [舉報垃圾留言]

[27]

其實我是一個會偷看你Blog的人, 因為你的留言實在太搞笑了, 所以我就會得閒上看看逛逛,打擾了!今次看了你的週記,真的讓我好有同感.感覺就像認識你的....很親切。現在的老師真的很忙呀, 可能新一代沒有雙週記了,因為他們要做很多行政工作。


[引用] | 作者 Aster | 17th Oct 2006 00:23 AM | [舉報垃圾留言]

[28] 回Aster

歡迎歡迎,可是用不著偷看啊,我很公開的,請務必光明正大地看吧﹗
反正網名背後的都不知是誰人,搞不好你真的認識我也說不準喔﹗
現在的老師無可否認比以前的辛苦多了,所以即使真要學生們寫週記,也未必可以有時間細閱了,只能當成是訓練學生寫作的工具了,不能透過週記多了解學生真可惜呢﹗


[引用] | 作者 皇帝 | 17th Oct 2006 18:00 PM | [舉報垃圾留言]

[29] 幾好丫

我唔識寫周記架......希望你可以教下我啦
你都幾搞笑丫^^~*把自己以前的周記拿出來給人看....還真幼稚呢!!


[引用] | 作者 唔講 | 7th Sep 2008 18:35 PM | [舉報垃圾留言]

[30] 回唔講

周記其實都冇乜格式規定,都係將自己生活的點滴寫底就已經係,唔駛教架,試下寫下就得啦﹗

就係自己都覺得好笑先攞出黎啫,如果係寫正經事既都費事嘥時間打出黎啦﹗

皇帝
[引用] | 作者 皇帝 | 7th Sep 2008 22:06 PM | [舉報垃圾留言]